(9 сентября 2020) Туннэ Эшъяськон юртын Пичи Кенеш ортчиз. Удмурт азьветлӥсьёс вераськизы, удмуртъёслэн ӧтчамзылы дасяськон, Глазовын но Можгалан удмурт классъёсты усьтон, Йӧскалык прессалэсь юртсэ кылдытон но трос мукетыз сярысь.
Улон сётӥз ке, вань удмуртъёслэн съездзы ортчыны кулэ туэ 3-тӥ толсуре Удмурт театрын. Кызьы вераз “Удмурт Кенеш” огазеяськонлэн тӧроез Татьяна Ишматова, 15-тӥ шуркынмонозь ёросъёсысь ёзъёлэн конференциоссы ортчыны кулэ, отын кенешчиос 4 ужан арлы йылпумъянъёс лэсьтозы, азьланезлы быдэстоно ужъёсты чаклалозы, быръёзы ӧтчаме мынӥсь адямиосты.
Шумпотымон, кылем арын Глазовын но Можгалан удмурт кылэз дышетонъя классъёс усьтэмын вал. Можгалан 8 школаосын 326 пинал удмурт кылэз факультатив но кружок амалэн дышето, со понна вань кулэ учебникъёссы вань. Можгалан чаклало, нырысетӥ арзэ удмурт кылэз дышетэм пиналъёс кыкетӥ араз удмурт кылэз прдемет чотын дышетыны кутскозы шуыса. Та сярысь вераз Можгалась Дышетонъя управленилэн кивалтӥсезлэн воштӥсез Ирина Кузякина.
Татьяна Ишматова пусйиз, али удмурт классъёс усьтӥсько ке но, ми азьын эшшо но бадӟымгес ужпум сылэ: уйпал но лымшор палан улӥсьёс понна удмурт гимназиос кылдытоно. Та бордын эшшо но чырмытгес ужано.
Пичи Кенешлэн ортчемез сярысь пыр-поч лыдӟыны быгатоды «Удмурт дунне» газетлэн 17-тӥ сентябре потоно номерысьтыз.