(9 июня 2018) Удмуртъёслэн вашкала гуръёссыя «Чакара» фестиваль Киров улосвылысь Вятские Поляны карын 9–10 инвожое ортчоз. Со сярысь ивортэ Удмуртиысь Калыкъёслэн эшъяськон юртсылэн пресс-службаез.
Кылэз, лулчеберетэз, йылолъёсты утён но азинтон вылысь радъяськись фестивале Россилэн улосвылъёсысьтыз удмурт фольклоръя коллективъёс пырисько: Удмуртиысь, Башкортостанысь, Татарстанысь, Марий Элысь, Пермь шаерысь, Свердловск, Киров, Томск улосвылъёсысь, Ханты-Мансийскысь, Санкт-Петербургысь, Москваысь, озьы ик Эстониысь.
Фестиваль улсын творчествоя коллективъёслэн возьматонъёссы, удмуртъёслэн киужъёссыя мастер-классъёс, йӧскалык шудонъёс, вожвылъяськонъёс, этнодискотека но мукет ужрадъёс чакламын.
Тодэ вайытом, 2017-тӥ арын «Чакара» фестиваль Татарстанысь Кукмор карын ортчиз. Фольклоръя ужрадэ 4 сюрс пала адями люкаськиз.